ابويا....مش حنين
*
طيب...؟؟
اكيد
بس مش من النوع الحنين
طب هوه فى انواع فى الأباء اصلاً..؟؟
اكيد
فى الحنين..او ممكن نسميه الطيب
وده بيرتبط اكتر بلو كان بعيد بصورة ما او بأخرى عن الدنيا
عن الواقع
الزمن جرى عشرين تلاتين سنة وهوا لسة واقف
كويس..؟؟
اكيد
كل الأباء كويسين
دى قاعدة رقم واحد
الدين والمجتمع بيقول كدة
وده صح
طب والباقى...؟؟
طيبين برضة بس فى صفات تانية تغلب عليهم
زى القسوة
قسوة مع طيبة
ممكن
زى التشائم
ممكن أبوك أو أمك وغالبا بيكون الأب متشائم
كاره البلد ...ومش فى ايده حاجه
وممكن يكون ثورجى
او بلغة تانية روش
مصاحب ولاده ومفيش بينهم اسرار
وممكن يكون طيب جداً
يعنى فى حاله
وغالبا لما يكون ملوش علاقة بشغلك وحياتك
مفيش فى ايده حاجة
سايبك تتعرف انت على الدنيا مع نفسك
وهو كل يوم فى صلاة الفجر بيدعيلك
يعن ببساطة كل الأباء والأمهات دول زينا بالظبط
منهم الذكى...والأقل ذكاء
والمسالم...والمحظوظ
وكدة
كلام تمام
وبطبيعة الحال احنا كمان هيجى علينا يوم ونكون احنا الجيل الكبير فى البلد
لما رئيس الجمهورية يكون فى سنك مثلاً
حلو
طب صفات الأنسان اصلاً بتتكون ازاى...؟؟
يعنى اللى بيخلينى انا قاسى مثلا او رومانسى او اى حاجة....إيه..؟؟
تربية...ظروف...اهل...طبيعة..؟؟
العلم والعقل يقولوا تربية..بيئة
حلو
طب انت لو فى بيت بصفات معينة...مثلا اهلك طيبين فشخ
ينفع انت تطلع بلطجى مثلاً..؟
ممكن
طب ده عكس اهلك...يعنى انت اتولدت بلطجى من الأول..؟؟
ولا طيبة اهلك هى السبب فى ده
ضعفهم مثلاً
والطيبة ضعف
الواقع بيقول كدة
او طيبة ..معاها فقر..فى منطقة شعبية...يتولد...بلطجى
جميل
طب اهلك نفسهم مش بتحكمهم نفس العلاقة مع جدودك..؟
اكيد
اذا الموضوع سلسلة...وجيل بيسلم جيل
طب يجى سؤال مهم
انت ليك الأختيار ..؟؟
بمعنى
اهلك لو قاسيين...هما كان عندهم الفرصة يكونوا غير كدة..؟؟
ولا ده إجبار
على أساس
فاقد الشىء لا يعطيه
ولا العكس..؟
فى حاجة اكيده...انهم بيحبوك
واياً كان اختلافهم معاك
ده لو فيه اختلاف
فهو عشان مصلحتك
او اللى فى نظرهم انها مصلحتك
لأن ببساطة
فى عاطفة اكبر من اى مشاعر تانية
اقوى من القسوة والكره والطيبة والشر
الأبوة أو الأمومة
فى الأنسان..وقبله فى الحيوان
انت متجوز...؟؟
بكرة تتجوز وتعرف معزة الأبن
كلمة بنسمعها كتير على لسان اللى متجوز وبيحاول يبص على نص الكوباية المليان
ودى حاجة غريبة
لأن كدة مشاعر الأبوة نوع من انواع الأنانية
نوع من انواع الأستمتاع
جميل
يعن عشان اللى خلقك عارف اد ايه انك مخلوق انانى
ربطلك استمرار الحياة..وبقاء النوع
بشهوة...وعاطفة
الجنس و استمتعاك انت الشخصى بأبوتك
طب فيه سؤال..؟؟
ولادك فين حقهم فى اختيار الوجود من عدمه..؟؟
يعنى عشان سيادتك عايز وطلبة معاك تتجوز
ومش لاقى مبرر أو ميزة غير الخلفة تتجوز وتخلف...؟؟
بلاش
هوه ده اللى المفروض يحصل ولا العكس
مثلاً
اشوف انسانة احب انى اكمل معاها حياتى
فنتجوز
وعشان بحبها..واتجوزتها..اكيد هكون مبسوط لو ارتبط بيها اكتر
نعمل عائلة
كده العيلة مبنية صح
طب لو ده مبيحصلش فى الواقع
يبقى احنا مسيرين ولا مخييرين..؟؟
اكيد مخييرين
الدين بيقول كدة
طب ايه الفكرة..؟
مش ممكن نكون احنا اللى بنجبر أنفسنا نكون مسييرين..؟؟
يعنى بنحط قواعد لواقع وهمى من صنعنا احنا هو ابعد ما يكون عن خلق الله وفطرته فى كونه
سؤال اخير
ابويا قاسي شوية
ممكن اكون كده مع ابنى...ولا العكس؟
سؤال جالى الساعة ستة الصبح
4 comments:
حاقولك حاجة
ايه اللي بأثر في الإنشسان و شخصيته
التربية ... الطبيعة.. الأهل.. البيئة
كل ده مع بعض بيعملوا لبني آدم
أنا كارهة فرض سيطرة الأب و الأم على أولادهم من غير ما يراعوا رغباتهم و ميولهم في مجالات كتير زي التعليم و اختيار الأصدقاء و إقتناء الأشياء
هل ده معناه إني حعامل أولادي بالاسلوب اللي أنا شايفة إنه الصح؟؟
ده يتوقف على مدى جديّتي في التربية
ومدى تركيزي على هدفي
ومدى رفضي للتسلط اللي رفضته وأنا إبنة
ومدي صحتي النفسية
الجدية و الصحة النفسية همّ أكبر عاملين يخلّوك تعرف تتفادى كل اللي رفضته قبل ما تكون أب و تخليك تراعي كل اللي إتمنيته فإبنك
أكيد كل أم وأب بيحبّوا أولا دهم.. معاك طبعا
وأكيد كلهم بيتمنوا لهم أفضل الأشياء.. لا غبار على الكلام ده
ده طبيعة فينا.. مش مخيّرين فيها
لكن .. هل أكيد كلهم
جادين في تكوين شخصية سوية و قوية وقادرة على التفاعل مع الحياه لأولادهم
لأ طبعا
ده بقى يتوقف على الثقافة؟؟
لأ برضه
يتوقف على الوعي
آه
طيب الوعي لوحده؟
لأ طبعا
الوعي .. مع الإراده.. مع ذكاء
الأسرة ما بتتكونش صدفة.. و لا الأولاد بيتربّوا ربّاني.. ولا القرار سهل
وعشان كده بتلاقي فاسد من ظهر عالم و عالم من ظهر فاسد
ممكن تلاقي عالم .. متدين .. راقي أخلاقيا وماديا.. إبنه فاشل .. صايع .. متدني أخلاقيا و ماديا
وعند مساخة كبيييرة لتخيل الأسباب
البوست ده عاوز بوست عشان يترد عليه
لكن الأبوة و الأمومة هما مشاعر في غاية الروعة و الجاذبية لأي إنسان
لكنها أيضا مسئولية في غاية الأهمية و الصعوبة
و المشكلة أن كثير منّا لا يراها كذلك..
اولا مبرووووووووووووك علي شكل المدونه الجديد
انا بحب اللون الازرق جدا بيريحني اوي والله
ثانيا
موضوعك شائك للغايه
والاسئله الي بتطرحها محتاجه لالف اجابه والله
اولا خلينا نقول ان الاب والام هما اساس صناعه الابناء
من والطفل في بطن امه
مليون الف عامل بيأثر فيه
انت عارف لو الام بتتنرفز بسرعه
يطلع ابنها او بنتها زيها
كل شيئ يخضع لقوانين الوراثه
الطفل بيتولد في محيط دائره صغيره
اطرافها بتكون في ايادي العائله
وفي اول كام سنه من عمر الطفل
بيبتدي يكون صور عن كل شيء شافه وتنطبع كل الزكريات وردود الافعال علي مختلف المواقف في دماغه
لما بيكبر ويشب ويخرج الي العالم الخارجي
بيبتدي تشكل شخصيته عوامل عده
احتكاكه بالمدرسه والجيران وكل شيء
والجامعه لغايه ما يكون انسان صالح او لا
يعني علشان متهش مني
مش بس الاب والام هما الي مسؤولين
المجتمع والبيئه والظروف
زي ما قالت هنووده بالظبط
حته التربيه في دي انا مؤمنه فيها ان فاقد الشيء لا يعطيه
مع احتلاف بسيط انه ممكن يحاول لكن مش هيوصل للمطلوب
يعني لو اب كان والده قاسي
ابنائه اكيد مش هيعاملهم بقسوه لكن برضه مش هيعرف يديهم الحنان
هيترجمه لواقع عملي ملموس
يعني يبن حبه بالفلوس
بالاهتمام بالتعليم
لكن الكلمات الحلوه الي تعبر عن حبه
لمسه ايده علي وجه احد اولاده
مش هيقدر يعملها ابداا
صدقني عن خبره الكلام دا
مش عايزه اطول عليك
بس ابقي طمني عليك دايما الله يخليك وقولي هتسافر امتي
اياك تقطع
لحسن همارس مهنتي علي اسنانك
انا قولتلك والله علي ما اقول شهيد
ربنا يوفقك
تحياتي
فعلأ المجتمع والأهل والعادات والتقاليد
بيقولو أن الأب وألأم
كويسين وممتازين
يخلي الواحد سأل نفسه
أمال فين الناس الوحشه!!!!!!
أكيد متجوزوش وبقي عندهم أولأد!
بس بجد أهم حاجه أنهم فعلأبيحاولوا يبذلوا اللي يقدروا عليه
بوست جميل!
الحمد لله
انا امبارح دخلتلك ما عرفتش اعلق ولا اقرأ لان الصفحه كانت بيضه والكتابه بلون تركواز بس كنت حاسه ان فيه كلام حلو لازم يتقرا عشان كده رجعت النهارده وسعدت جدا لانى عرفت اقرأ وبالتالى فى فرصه انى اعلق.
كبشر كلنا عندنا نفس المقومات ربنا خلقناكده ولكن يتأثر الانسان بكل ما يحيطه من عوامل مؤثره كالبيئه والاسرة وثقافه المجتمع الذى ينشأ فيه والعادات و الوضع السياسى والاقتصادى
فتتضح اشياء وتغيب اشياء وتتبلور شخصيه كل فرد وكلما تقدم به العمر يزداد خبرة ووعيا وتطورا فتتغير المفاهيم مرة اخرى ويظل هكذا فى تغير وتطور دائمين فلا شىء مطلق كل الاشياء نسبيه.
بس الاكيد ان كل الاهل بيحبوا اولادهم
بس طرق الحب مختلفه
ومن الحب ما قتل.
تحياتى لافكارك المهتمه.
Post a Comment