خلاص
الفيزا جت
والوقت فات
لمّ لبسك
والحاجات
هات هدومك
ويا صورتك
ويا احلى الذكريات
وحط كله
جوه شنطة
عليها اسمك
وجنبه شرطة
اسم بلدك
ويلا اطلع على المطار
***
هات سنينك
هات حنينك
وكام كتاب عليها اسمك
حتى اهلك
هات صورتهم
ويا صوتهم اللى فى خيالك
يمكن هناك
تعرف تشوفهم..جوه عقلك
هات صحابك
جوه قلبك
هات كمان كل اللى حبك
خد من كل واحد فكرة
وحط كله جوه شنطة
عليها اسمك
جنبه شرطة
اسم بلدك
ويلا اطلع على المطار
***
اوعى تنسى
هات شارعكوا
قصدى يعنى ذكرى منه
ومن سريرك
ومن مريتك
بص فيها
واوعى تنسى اللى فيها
ومن خواتك
ومن ولادهم
كله كله
هات منه حته
أو حتى كلمة
تفتكرها وانت قاعد
هناك لوحدك
هات معاك كمان حكاية
من طفولتك
وحتة اكبر من رجولتك
هات كمان ريحة حبيبتك
لو فاكرها
ويا ريحة حد منك
زى امك
وأكل امك
اوعى تنسى تبص فيه
وتشم منه
يمكن ترجع متلقيش
لا اكل امك
ولا حتى امك
وحط كله جوه شنطة
عليها اسمك
جنبه شرطة
اسم بلدك
ويلا اطلع على المطار
***
هات معاك كل اللى شفته
جوه بلدك
جوه عقلك
وحط كله جوه صورة
فيها نيلها
ويا ليلها
ويا أحلى حاجة فيها
كل ناسها
فيها اهلك
فيها عمرك
فيها احلى يوم عرفته
فوق مقطم
تحت سعد
فى الميدان
وسط قهوة
او يوم فى شرم
من زمان
حط كله جوه شنطة
عليها اسمك
جنبه شرطة
اسم بلدك
ويلا اطلع على المطار
***
لو حاولت تجيب ده كله
وفى وسط شنطة..تحط كله
مش هتقدر
غصب عنك مش بإيدك
هتسيب ملامحك
وابتسامتك
وحضن امك..ولون عينيها
ويا صوتك وسط اهلك
ويا ضحكة من صحابك جوه ودنك
تحس بيها
ويا حتى سقف اوضتك
صوت شارعكوا
لون طفولتلك
هتسيب ده كله
ولا أقولك
حطه كله جوه قلبك
وحط قلبك جوه علبة
عليها اسمك
جنبه شرطة
اسم بلدك
ويلا اطلع على المطار
وهناك تسيبه
ولما ترجع
هتلقيه..وسط الف علبة تانية
عليها اسم زى اسمك
جنبه شرطة
اسم بلدك
اللى يمكن متكنش
بلدك
16 comments:
الله يسامحك
الله يسامحك
الله يسامحك
انا كنت بدائت اتأقلم
عارف لما تنفخ في الرماد
عارف لما تعكر بركه كانت بتبتدي تهدي
عارفه لما تحرق حد بكلامك
الله يسامحك
كلامك كله انا حسه بيه وحسيت بيه قبلك
ربنا يعينك يا رب
خد بالك من نفسك وصدقني هدعيلك من كل قلبي ربنا يوفقك ويكتبلك في كل خطوه سلامه ونجاح وتوفيق
امين يا رب
ابقي طمني عليك
تحياتي يا اخي العزيز
بوستك بجد وجعلي قلبي و آثار شجوني
رغم اني ماتعرضتش لتجربه الغربه بالجسد برا الوطن
بس كلماتك اثارت بجد شجوني و خلت دموعي تفلت كاني بمر بلحظات الاغتراب دي
مشاعر قويه وحساسه
لانسان فنان وحساس بمعنى الكلمة
تحياتي
يــــاااه يا فان جوخ
كل ده جوّاك.. حساه و عارفاه و عارفة أنه أكتر من اللي كتبته رغم إن اللي كتبته يوجع قوي
ويصحي ألم جنني في وقت ما .. خلاني أتفرج على النهار و الليل كل يوم وهمّ بيتحدّوني بإني مش حاعرف النوم
مش عارفة أقولك خدهم معاك و لاّ سيبهم
خدهم عشان تعيش بيهم
ولاّ سيبهم في حضن غرفتك و بيتك بدل ما تمرمطهم معاك؟؟
أصل الغربة مرمطة
مرمطة للقلب و المشاعر و الإحساس
حتى لو عايش في الجنة
ياااه
فكرتني بإحساس يرعب
بتمنى إنه يعدّي عليك بأخف خسارة
ربنا يقوّيك بجد و يهوّنها عليك و يعدّي لحظات الرحيل بالذات على خير
ودعوة كمان نفسي ربنا يتقبلها منّي
وهي ياااارب يحافظلك يا صديقي على قلبك زي ما هو .. قادر يحس باللي طول عمره حس بيه
وقادر يلمس الأمل بين كل تحدديات الحزن
يارب
مش عارفة أعمل ايه لألمك اللي حاساه دلوقت.. ربنا يهونها يا رب
تحياتي لقبلك اللي ربنا يستر ع اللي فيه
العزيز فان جوخ
انت مجمع عندك كل المتغربين
كلامك جميل وكنت حاسه انى باجرى وانا باقرا بجد زى ما اكون انا اللى بالم الشنطه
مش عارفه دى اول مرة شكلك تسافر وتتغرب
بس بجد السفر جميل وممتع لو حطيت فى بالك انك رايح تكتشف ناس واماكن و ثقافات تانيه
و حاجات جديده عليك
بجد حتستمتع
بس عموما احنا واخدين على اننا نفضل فى حضن بلدنا واهلنا
اتمنى انك تستفيد من الفر
لانهم بيقولوا فيه 7 فوائد ويمكن اكثر
تحياتى
سعيده بمعرفتك وزيارتك
ياااااااااااااااااااااه
طيب انا ببكي دلوقتي
انتمش عارف ان فيه ناس بتلمس ملامح الكلام وتحس بيه
كلامك روح حيه وجعتنى اوى
اتفضل بئا ناولنى كلنكس
ولا حتى كم قميصك
حلوة اوى
الله يوفقك فى اى مكان
bos ana awel mara a3milcomment 3andik bes bgd by3gbny tari2t katbtik w el poem to7fa begd
el 3'orba dy as3ab hga w 7'asosn law nas 3'alia 3andik ana 2 sisters masfreen begd sa3ba awwwwwi
begd 2alibt kol hga gamad awi
مش عارفه أقولك حاجه غير إن دموعي نزلت .... ربنا يوفقك
وإن شاء الله هترجع تلاقي كل حاجه كويسه وتلاقي كل اللي بتحبهم
ربنا يهون عليك الغربه
عبرت عنها أوي
الغربه لو نطقت يمكن مش هتوجع زي كلامك
سلامي ليك
وإبقي طمنا عليك
بجد
صحيح الله يسامحك
نكدت عليا
لا انت خلتني ادمع بجد
بجد انت انسان رائع جدا
ياه قد ايه الغربة صعبة
وقد ايه كلامك اصعب
بس تفتكر الحياة هتسيبنا نحفظ كل شىء
وتبقى لينا كل شىء
ده احنا ذكرى فى وسط الف مليون ذكرى
وشوف لى شنطه معاك تشيل كل ده
تحياتى
مش عارفه ابدأ منين
شعرك صحى جوايا الحنين لحضن امى و لو انها مش بعيد عنى
و ليه يسافر .؟؟ و ليه يتغرب ؟؟ و ليه يسيب صوره مرايته و حضن اهله
ولا حبيبته اللى بالدمع بتقوله بلاش تسافر
عارف لما تحس بغربه بعيد عن اهلك
اهون بكتير من الغربه جوه بيتك
بعيد عن كل النكد ده
شعرك حلو جدا و موزون ... على حد علمى يعنى .. انا بحب الشعر اوى اكيد هتلاقينى هنا كتير
القصيدة دي توجع القلب
يااااااااااااه
جميلة أوي بجد
والله مش بجامل
مش عارفه اقولك ايه
يااااااااااااااااااه
حلوة بجد
مكنتش عارفه انك فنان عالى كدا
بجد حلوة اوى واسلوبك رائع
بجد رااااااائعه
سلام
:))
انت رحت فين يا ابني
سافرت ولا ايه
طيب قولنا بساختفيت فين
طمنا عليك لو سمحت
رحت فيييييين
:(
مش قادرة أكتب
لأني بقالي 6 سنين باتنطط من مكان لمكان ولغاية دلوقتي مش مستقرة...أي نعم من بطلع برا مصر...بس حكاية الشنطة دي صعبة أوي..ألم وأفضي وأفضي وألم...ولسة هلم وأفضي قريب من تاني إن شاء الله
وجعتني أوي وقلبت عليا المواجع
اللهم ارزقنا الثبات يا رب
:)
نوني
انت فين يا فان جوخ مفتقدة مدونتك بشدة
يا رب تكون بخير ابقى طمنا عليك ولو سافرت كلنا معاك
متقطعش المراسيل
ولو انى مش هعتبرها قصيدة لضآلتها فنيا
ومش تزعل
إلا انك أثرت فيا
تحياتى
Post a Comment