خلاص
الفيزا جت
والوقت فات
لمّ لبسك
والحاجات
هات هدومك
ويا صورتك
ويا احلى الذكريات
وحط كله
جوه شنطة
عليها اسمك
وجنبه شرطة
اسم بلدك
ويلا اطلع على المطار
***
هات سنينك
هات حنينك
وكام كتاب عليها اسمك
حتى اهلك
هات صورتهم
ويا صوتهم اللى فى خيالك
يمكن هناك
تعرف تشوفهم..جوه عقلك
هات صحابك
جوه قلبك
هات كمان كل اللى حبك
خد من كل واحد فكرة
وحط كله جوه شنطة
عليها اسمك
جنبه شرطة
اسم بلدك
ويلا اطلع على المطار
***
اوعى تنسى
هات شارعكوا
قصدى يعنى ذكرى منه
ومن سريرك
ومن مريتك
بص فيها
واوعى تنسى اللى فيها
ومن خواتك
ومن ولادهم
كله كله
هات منه حته
أو حتى كلمة
تفتكرها وانت قاعد
هناك لوحدك
هات معاك كمان حكاية
من طفولتك
وحتة اكبر من رجولتك
هات كمان ريحة حبيبتك
لو فاكرها
ويا ريحة حد منك
زى امك
وأكل امك
اوعى تنسى تبص فيه
وتشم منه
يمكن ترجع متلقيش
لا اكل امك
ولا حتى امك
وحط كله جوه شنطة
عليها اسمك
جنبه شرطة
اسم بلدك
ويلا اطلع على المطار
***
هات معاك كل اللى شفته
جوه بلدك
جوه عقلك
وحط كله جوه صورة
فيها نيلها
ويا ليلها
ويا أحلى حاجة فيها
كل ناسها
فيها اهلك
فيها عمرك
فيها احلى يوم عرفته
فوق مقطم
تحت سعد
فى الميدان
وسط قهوة
او يوم فى شرم
من زمان
حط كله جوه شنطة
عليها اسمك
جنبه شرطة
اسم بلدك
ويلا اطلع على المطار
***
لو حاولت تجيب ده كله
وفى وسط شنطة..تحط كله
مش هتقدر
غصب عنك مش بإيدك
هتسيب ملامحك
وابتسامتك
وحضن امك..ولون عينيها
ويا صوتك وسط اهلك
ويا ضحكة من صحابك جوه ودنك
تحس بيها
ويا حتى سقف اوضتك
صوت شارعكوا
لون طفولتلك
هتسيب ده كله
ولا أقولك
حطه كله جوه قلبك
وحط قلبك جوه علبة
عليها اسمك
جنبه شرطة
اسم بلدك
ويلا اطلع على المطار
وهناك تسيبه
ولما ترجع
هتلقيه..وسط الف علبة تانية
عليها اسم زى اسمك
جنبه شرطة
اسم بلدك
اللى يمكن متكنش
بلدك
