مملكة الخوف

لم افقد يوما ايمانى

بقلوب الناس

لم افقد يوما احساسى

بوجود الماس

ما بين الأضلع والأنفاس

وفى اى مكان اسكنه

تحملنى امالى الى الطرقات

الى انهار من الأحساس

ابحث عن وجه يعرفنى

عن لحظة حب

عن احداث

*****

حملتنى يوما اقدارى

لبلاد الخوف

سيفٌ...جلادٌ...ورمال

ووجوه فقدت ملامحها

من اجل المال

فأختلط الأصفر بالأبيض

الكل يطوف

وقلوب اناسٍ قد عفنت

برائحة الخوف

اطواق حديد حول الأعناق

وعبيد سرحت بلا اطواق

وسجون وسعت اسوارها

احلام الوف

*****

ممنوع ان تشعر او تفهم

ممنوع كل الأحلام

ان يعلو صوتك بالأنغام

ان تهمس فى اذن حبيبتك

او حتى تنام

واللون الأسود قد غطى

كل الأشياء

اشياء فقدت ارواحها

والأسم نساء

وشقوق تركت للأنفاس

صارت انهار للإحساس

وعيون تصرخ من حولك

انقذنى

من عتم العزلة...والأوهام

*****

السجن كبير اتعبنى

اتعب حتى السجان

فقيود السجن من زمن

قد دمغت فوق السجان

والكل يحاول ان يهرب

ان يحلم

ان يشدو بين الاركان

والسجن كبير

يرهقهم

ينسيهم طعم الأوان

فأمامك الون الأبيض

لتعيش وسط الرهبان

والون الأسود ينتظرك

لو شئت صرت الشيطان

لا شيىء اخر لإمثالك

اختار اى اللونان

الثمن كبير

الثمن كبير

ان تدفع من اجل المال

ما يثبت انك انسان

كل سنة وانتوا طيبين

21/April 2007

عملت مدونة

وكتبت اول بوست

كان كله بسبب مدونة اسمها

سامحونى مكنش قصدى

http://sam7oni.blogspot.com/

ظهرتلى بالصدفة وانا قاعد بلعب على جوجل

قريت

اتشديت

ندمت على كل يوم قاطعت الكتابة فيه

وعملت مدونة

وبقى ليا فيها اصحاب

اسأل عليهم

ويسألوا عليا

لو سألتونى ايه اهم حاجة عملتها فى السنة اللى فاتت دى كلها

هقول ان دخلت عالم المدونات

سنة عدت..واكتر

كل سنة وانتوا طيبين

يا احلى عالم افتراضى فى كل العوام الأفتراضية الأخرى

:)

قصدى يا عالمى الحقيقى

All of your contact are offline......

بتخنق اوى لما اشوف الجملة دى
عارف لما تبقى داخل على النت..بتدور على حد تتكلم معاه
وتلاقى كله نايم...كله اوف لاين
طب تخيل بقى لما يكون ده احساسك العام فى الحياة
ان كل اللى حواليك اوف لاين
ببساطة متغرب...وفى الغربة مفيش اصحاب
ايوة مفيش اصحاب
دى الحقيقة اللى وصلتلها بعد حوالى سبع شهور فى الغربة
ممكن يكون السبب فى السن..ان احنا كبرنا وخلاص مفيش وقت ولا اعصاب انك تستحمل ناس جديدة فى حياتك
بعيوبهم قبل مميزاتهم
فإن كان ممكن يحصل وانت فى بلدك
فما بالك بالغربة
المكان اللى فيه كلهم كانوا نفسهم يبقوا مش فيه
فاهمنى..؟؟
يعنى مجتمع كل اللى موجود فيه جاى بصفة مؤقتة
لأهداف مادية اولاً..وثانياً
ولو فيه اهداف تانية فأكيد مش من ضمنها ان يعرف ناس جديدة
يعرفهم لحدود الصداقة
ممكن زمالة عمل... بس بعد كده نفض
من كام يوم كنت قاعد بفتكر شلة مصر
اصحابى اللى فعلاً طلعت بيهم من الدنيا
وافتكر حاجات..وأضحك وانا لوحدى
وفجأة ظهرت حقيقة قدام عنيه كإنى بشوفها لأول مرة
انه خلاص
الشلة والقعدة...وشقة المعادى..ووقفة المقطم
وكل حاجة حلوة جمعتك بأصحابك فى مصر
خلاص
اصلاً كل واحد من الشلة دى بقى فى بلد
اللى فى الكويت ..واللى فى البحرين..واللى فى قطر
واخوكم فى السعودية
مش هتجمعنا بعد كدة غير اجازات
وياترى من يكون موجود....ومين اللى هنفتكره
ونتصل بيه ونقوله..القاعدة نقصاك
حتى القعدة فى الاجازات دى هتكون غير زمان
اماكن مختلفة...وأوقات مختلفة
مش هيبقالنا غير إننا نفتكر ايام زمان
اللى بقت خلاص
زى ايام عبد الناصر كدة
او بطريقة اخرى زى ايام ابتدائى واعدادى..وثانوى..وكلية
مراحل...حياتك مراحل
ولازم تتعود على كدة
وتتعود كمان ان كل مرحلة اسؤ من اللى قبلها
التاريخ بيقول كده
يعنى دلوقتى انا فى مرحلة الغربة..ما قبل الزواج
والله وحده اعلم...ما هو عنوان المرحلة القادمة
وبمناسبة مرحلة الغربة ما قبل الزواج
طول عمرى كان نفسى اعيش لوحدى
كنت بقول انا هبقى سعيد....لو سكنت لوحدى
بختار شقتى..عفشى..وكل حاجة الاقيها مكان ما اسيبها
بعد شوية غربة..وعيشة منفردة
هما مش شوية..اكتر
اكتشفت ان حاجة زى انك تلاقى كل حاجة مكان ما انت سايبها
بتعمق احساسك بالوحدة
بتفتقد انك تزعق وتقول...فين اسمه ايه اللى كان هنا
بتفتقد انك تكلم حد قبل ماتنام
بتفتقد الصحيان الصبح على صوت حركة فى البيت
وتبدأتقعد بليل وتخش على النت يمكن تلاقى حد تتكلم معاه
ولما ما تلقيش..تفتح مدونتك وتكتب
عن ايام مش راجعة تانى
وعن احساس بالوحدة..بيقتلك كل يوم عن اللى قابله

من منى لى منى..يا قلبى لا تحزن

النهاردة شفت حلقة العاشرة مساءً بالصدفة
منى الشاذلى فى حوار مع رفعت السعيد..رئيس حزب التجمع
النهاردة تانى....بالصدفة برضة منى الحسينى جايبة واحد كدة المفروض انه رئيس حزب الكرامة
هيه موضة.....؟؟
وكله بيتكلم عن البلد..والقمع...والحزب الحاكم و و و و و
هوه فيه ايه؟؟
ماشى موضة والمذيعين راكبنها
بس الحكومة ساكته ليه..؟؟
نوع من انواع التنفيس عن الشعب عشان ميفرقعش فى وشهم
ماشى
الشعب بقة فين...؟؟
فعلاً بيسمع الكلام ده........؟؟
طب لو سمعه فعلاً بيهديه...؟؟
بينسيه سعر الرز والزيت...والكام مطوة اللى مستنينه فى طابور العيش...؟؟
مش هقول اسعار الشقق
لأن دى بيقت مشكلة المتغربين
هما دول...اللى من حقهم يحلموا...ويخططوا عشان يلاقوا اربع حيطان تلمهم
أما اللى فى مصر...فمعتقدش ان فيه شاب عاقل بيشتغل شغلة شريفة ممكن يفكر يجيب شقة لنفسه بنفسه
طب ايه برضة؟؟
مصر بقى فيها حالة غريبة
مش قادر افهمها
مش عارف هل ده بسبب انى بعدت عنها
ولا بسبب انها داخلة على مرحلة هي نفسها مش فهماها

من وحى الغربة

" أنا مش هتكدر لوحدى.........لازم تبقوا عرفين..لو هتكدر..هنكدر كلنا "

هكذا صرخت وأنا فى وسط الشقة

موجها كلامى للانتريه والسفرة

متعمد ان اعلى صوتى..حتى يصل إلى حجرة النوم

فغداً المقابلة الحاسمة

أما يصير عقد الشقة بإسمى

وأما ابحث أنا وثلاث حجرات عن مكان اخر

(يلعن ابو العوايل على العزاب على السعودية..ولكل كليلة )

انا ناسى ايه.....؟؟

مسافر كمان ساعتين

عايز اقوم اقفل الشنط

حطيت كل حاجة...؟؟

احساس بيلح عليا بإستماتة

انت ناسى حاجة

ايه..ايه..ايه

هدومى...تمام

بدلى ..تمام

احزمة..جزم..نضارة...شاحن

ايه تانى....؟؟

الهدايا كلها حطتها من بليل

ايه اللى ناقص...؟؟

رخصتى

كنت هنساها

تمام

خطى القديم

موبينيل مش جوال

ايه تانى يا فان

شراباتك

تمام

جرافتاتك

ساعتك

ايه ناقص...؟؟

حاسس ان عقلى هيوقف

وجوايا الف كلمة..وميت الف فكرة بتطارد بعضها

انت ناسى حاجة.......؟؟

تانى

اه

قلبى

كنت هنسى ارجعه مكانه

:)

عبيدٌ أحرار...وأحرارٌ عبيد

أشعل سيجارة جديدة...أستنشق أول انفاسها بعمق
تأمل الورقة البيضاء الضائعة امامه..ومن فوقها قلمٌ لم يمسسه بعد
أطلق زفيراً حاراً.......مختلطلاً بإنفاس سيجارته الأولى
هل يكتب.............؟؟
إنها تترأى امامه طوال النهار...يشعر انه يمسكها
وحين يفكر فيها مكتوبة...مجرد التفكير...تتوه الكلمات
وتختفى الصورة


*****

الحرية

اكبر اثام الأنسان فى نظرى
فلأنسان قد خلق عبداً
وعبوديته هى سر وجوده
ولكن بصورة ما أو بأخرى
تناسى عبوديته المطلقة
وأخذ يبحث عن الحرية

*****

الحرية فى وجهة نظره..هى الداء
هى السراب الذى يجرى خلفه بنى ادم
غير مدركين...أو متجاهلين انهم منذ فجر الحياة
قد خلقوا عبيداً
عبيداً للخالق الواحد
عبودية ترفع من شانهم....وترتقى بأخلاقهم
فتركوا عبودية الله...الباقى
وعبدوا....بإسم الحرية
كل ما هو زائل

*****

الأنسان


مخلوق

لا يستطيع العيش فى تجمعات


*****
ايها السادة..عفواً...كلنا عبيد



انت

خلقك الله عبداً
فمن اين لك بالحرية........؟؟
هذا ان كانت هناك حرية من الأساس
فما هو موجود الان بإسمها...نوع أخر من العبودية
ادنى............وأحقر
عبودية الذات
فتجد من يعبد المال...ومن يعبد القوة..ومن يعبد الجسد
انواع واشكال مختلفة
وكلها ابعد ما تكون عن فكرة الحرية
من اين لك بالحرية...وقد خلقت عبداً؟؟
من فى هذه الارض...قادر بأن يهب الحرية...ولمن؟؟


*****
الافكار غير متزنة فى رأسه
او ربما رأسه نفسها هى التى تفتقد الاتزان
يحاول ان يدرك ما يفهمه
يحاول ان يخرجه على الورق
لكى يقراه بتمهل
يااااااااااااااااااااااااااااااااااااااااااااااااه
هكذا قال فى صوت خافت
كان يتعجب
من بعد ما يفهمه..عن ما يدركه
*****
العبودية


ان تكون عبداً لله...كما يريدك الله...وليس كما تريد انت

*****
المستقبل

تترأى له الصورة الان
يشعر بها...يكاد يلمسها
يرى فيها أناس غير الناس
وبلاد غير بلاده
يرى الناس وقد تركوا فكرة الحرية الحمقاء
واختارو عبوديتهم الازلية
فحكمتهم الشريعة
ونظمتهم قوانين
وزاد من جمالهم...اخلاق..وقيم..ومبادىء
فكانوا بحريتهم ان وجدت...عبيدٌ
وبعبوديتهم ..........أحرار