All of your contact are offline......

بتخنق اوى لما اشوف الجملة دى
عارف لما تبقى داخل على النت..بتدور على حد تتكلم معاه
وتلاقى كله نايم...كله اوف لاين
طب تخيل بقى لما يكون ده احساسك العام فى الحياة
ان كل اللى حواليك اوف لاين
ببساطة متغرب...وفى الغربة مفيش اصحاب
ايوة مفيش اصحاب
دى الحقيقة اللى وصلتلها بعد حوالى سبع شهور فى الغربة
ممكن يكون السبب فى السن..ان احنا كبرنا وخلاص مفيش وقت ولا اعصاب انك تستحمل ناس جديدة فى حياتك
بعيوبهم قبل مميزاتهم
فإن كان ممكن يحصل وانت فى بلدك
فما بالك بالغربة
المكان اللى فيه كلهم كانوا نفسهم يبقوا مش فيه
فاهمنى..؟؟
يعنى مجتمع كل اللى موجود فيه جاى بصفة مؤقتة
لأهداف مادية اولاً..وثانياً
ولو فيه اهداف تانية فأكيد مش من ضمنها ان يعرف ناس جديدة
يعرفهم لحدود الصداقة
ممكن زمالة عمل... بس بعد كده نفض
من كام يوم كنت قاعد بفتكر شلة مصر
اصحابى اللى فعلاً طلعت بيهم من الدنيا
وافتكر حاجات..وأضحك وانا لوحدى
وفجأة ظهرت حقيقة قدام عنيه كإنى بشوفها لأول مرة
انه خلاص
الشلة والقعدة...وشقة المعادى..ووقفة المقطم
وكل حاجة حلوة جمعتك بأصحابك فى مصر
خلاص
اصلاً كل واحد من الشلة دى بقى فى بلد
اللى فى الكويت ..واللى فى البحرين..واللى فى قطر
واخوكم فى السعودية
مش هتجمعنا بعد كدة غير اجازات
وياترى من يكون موجود....ومين اللى هنفتكره
ونتصل بيه ونقوله..القاعدة نقصاك
حتى القعدة فى الاجازات دى هتكون غير زمان
اماكن مختلفة...وأوقات مختلفة
مش هيبقالنا غير إننا نفتكر ايام زمان
اللى بقت خلاص
زى ايام عبد الناصر كدة
او بطريقة اخرى زى ايام ابتدائى واعدادى..وثانوى..وكلية
مراحل...حياتك مراحل
ولازم تتعود على كدة
وتتعود كمان ان كل مرحلة اسؤ من اللى قبلها
التاريخ بيقول كده
يعنى دلوقتى انا فى مرحلة الغربة..ما قبل الزواج
والله وحده اعلم...ما هو عنوان المرحلة القادمة
وبمناسبة مرحلة الغربة ما قبل الزواج
طول عمرى كان نفسى اعيش لوحدى
كنت بقول انا هبقى سعيد....لو سكنت لوحدى
بختار شقتى..عفشى..وكل حاجة الاقيها مكان ما اسيبها
بعد شوية غربة..وعيشة منفردة
هما مش شوية..اكتر
اكتشفت ان حاجة زى انك تلاقى كل حاجة مكان ما انت سايبها
بتعمق احساسك بالوحدة
بتفتقد انك تزعق وتقول...فين اسمه ايه اللى كان هنا
بتفتقد انك تكلم حد قبل ماتنام
بتفتقد الصحيان الصبح على صوت حركة فى البيت
وتبدأتقعد بليل وتخش على النت يمكن تلاقى حد تتكلم معاه
ولما ما تلقيش..تفتح مدونتك وتكتب
عن ايام مش راجعة تانى
وعن احساس بالوحدة..بيقتلك كل يوم عن اللى قابله

من منى لى منى..يا قلبى لا تحزن

النهاردة شفت حلقة العاشرة مساءً بالصدفة
منى الشاذلى فى حوار مع رفعت السعيد..رئيس حزب التجمع
النهاردة تانى....بالصدفة برضة منى الحسينى جايبة واحد كدة المفروض انه رئيس حزب الكرامة
هيه موضة.....؟؟
وكله بيتكلم عن البلد..والقمع...والحزب الحاكم و و و و و
هوه فيه ايه؟؟
ماشى موضة والمذيعين راكبنها
بس الحكومة ساكته ليه..؟؟
نوع من انواع التنفيس عن الشعب عشان ميفرقعش فى وشهم
ماشى
الشعب بقة فين...؟؟
فعلاً بيسمع الكلام ده........؟؟
طب لو سمعه فعلاً بيهديه...؟؟
بينسيه سعر الرز والزيت...والكام مطوة اللى مستنينه فى طابور العيش...؟؟
مش هقول اسعار الشقق
لأن دى بيقت مشكلة المتغربين
هما دول...اللى من حقهم يحلموا...ويخططوا عشان يلاقوا اربع حيطان تلمهم
أما اللى فى مصر...فمعتقدش ان فيه شاب عاقل بيشتغل شغلة شريفة ممكن يفكر يجيب شقة لنفسه بنفسه
طب ايه برضة؟؟
مصر بقى فيها حالة غريبة
مش قادر افهمها
مش عارف هل ده بسبب انى بعدت عنها
ولا بسبب انها داخلة على مرحلة هي نفسها مش فهماها

من وحى الغربة

" أنا مش هتكدر لوحدى.........لازم تبقوا عرفين..لو هتكدر..هنكدر كلنا "

هكذا صرخت وأنا فى وسط الشقة

موجها كلامى للانتريه والسفرة

متعمد ان اعلى صوتى..حتى يصل إلى حجرة النوم

فغداً المقابلة الحاسمة

أما يصير عقد الشقة بإسمى

وأما ابحث أنا وثلاث حجرات عن مكان اخر

(يلعن ابو العوايل على العزاب على السعودية..ولكل كليلة )

انا ناسى ايه.....؟؟

مسافر كمان ساعتين

عايز اقوم اقفل الشنط

حطيت كل حاجة...؟؟

احساس بيلح عليا بإستماتة

انت ناسى حاجة

ايه..ايه..ايه

هدومى...تمام

بدلى ..تمام

احزمة..جزم..نضارة...شاحن

ايه تانى....؟؟

الهدايا كلها حطتها من بليل

ايه اللى ناقص...؟؟

رخصتى

كنت هنساها

تمام

خطى القديم

موبينيل مش جوال

ايه تانى يا فان

شراباتك

تمام

جرافتاتك

ساعتك

ايه ناقص...؟؟

حاسس ان عقلى هيوقف

وجوايا الف كلمة..وميت الف فكرة بتطارد بعضها

انت ناسى حاجة.......؟؟

تانى

اه

قلبى

كنت هنسى ارجعه مكانه

:)

عبيدٌ أحرار...وأحرارٌ عبيد

أشعل سيجارة جديدة...أستنشق أول انفاسها بعمق
تأمل الورقة البيضاء الضائعة امامه..ومن فوقها قلمٌ لم يمسسه بعد
أطلق زفيراً حاراً.......مختلطلاً بإنفاس سيجارته الأولى
هل يكتب.............؟؟
إنها تترأى امامه طوال النهار...يشعر انه يمسكها
وحين يفكر فيها مكتوبة...مجرد التفكير...تتوه الكلمات
وتختفى الصورة


*****

الحرية

اكبر اثام الأنسان فى نظرى
فلأنسان قد خلق عبداً
وعبوديته هى سر وجوده
ولكن بصورة ما أو بأخرى
تناسى عبوديته المطلقة
وأخذ يبحث عن الحرية

*****

الحرية فى وجهة نظره..هى الداء
هى السراب الذى يجرى خلفه بنى ادم
غير مدركين...أو متجاهلين انهم منذ فجر الحياة
قد خلقوا عبيداً
عبيداً للخالق الواحد
عبودية ترفع من شانهم....وترتقى بأخلاقهم
فتركوا عبودية الله...الباقى
وعبدوا....بإسم الحرية
كل ما هو زائل

*****

الأنسان


مخلوق

لا يستطيع العيش فى تجمعات


*****
ايها السادة..عفواً...كلنا عبيد



انت

خلقك الله عبداً
فمن اين لك بالحرية........؟؟
هذا ان كانت هناك حرية من الأساس
فما هو موجود الان بإسمها...نوع أخر من العبودية
ادنى............وأحقر
عبودية الذات
فتجد من يعبد المال...ومن يعبد القوة..ومن يعبد الجسد
انواع واشكال مختلفة
وكلها ابعد ما تكون عن فكرة الحرية
من اين لك بالحرية...وقد خلقت عبداً؟؟
من فى هذه الارض...قادر بأن يهب الحرية...ولمن؟؟


*****
الافكار غير متزنة فى رأسه
او ربما رأسه نفسها هى التى تفتقد الاتزان
يحاول ان يدرك ما يفهمه
يحاول ان يخرجه على الورق
لكى يقراه بتمهل
يااااااااااااااااااااااااااااااااااااااااااااااااه
هكذا قال فى صوت خافت
كان يتعجب
من بعد ما يفهمه..عن ما يدركه
*****
العبودية


ان تكون عبداً لله...كما يريدك الله...وليس كما تريد انت

*****
المستقبل

تترأى له الصورة الان
يشعر بها...يكاد يلمسها
يرى فيها أناس غير الناس
وبلاد غير بلاده
يرى الناس وقد تركوا فكرة الحرية الحمقاء
واختارو عبوديتهم الازلية
فحكمتهم الشريعة
ونظمتهم قوانين
وزاد من جمالهم...اخلاق..وقيم..ومبادىء
فكانوا بحريتهم ان وجدت...عبيدٌ
وبعبوديتهم ..........أحرار

جايلك يا مصر

مسافر مصر يوم الاثنين
هقعد اربع ايام وارجع
فى الأساس نازل للشغل
بس اكيد هشوف الاهل والأصحاب
جايلك يا مصر

:)

كلاكيت اول مرة

المنزل

لم يستطع ان ينام تلك الليلة

حاول......وربما لم يحاول لمعرفته المسبقة بالفشل

فقد اكتفى بأن استلقى على سريره نزولا على رغبة امه

مضت لحظات من السكون

احس خلالها انه عاجز حتى عن التفكير

ولم يمض وقت قصير حتى قرر ان يخرج ليبحث عن احد يكلمه

فهذه اخر ليلة له فى المنزل ولن يقضيها فى محاولة مصطنعة للنوم

*****

المطار

اعتاد منذ فترة على طريق المطار

تارة يذهب لوداع صديق...وتارة لإستقبال صديق أخر

من من سبقوه فى الغربة

اعتاد على المطار وعلى احاسيس المطار

فقد شعر منذ اول مرة ان هذا المكان يحمل كثيرا من الاحاسيس المتناقضة

ما بين صالة الوصول والسفر

ما بين احساس القادم او المسافر نفسه واحساس اهله

وما بين مسافر وأخر

كان يستغل فترة الانتظار احسن استغلال...فيختار زاوية بعناية

ويراقب وجوه الناس بإستمتاع

*****

المنزل

خرج الى حديقة المنزل الصغيرة بحثا عن بعض الهواء

وجد اخته جالسة وحدها

الجميع متوتر...متحمس...متأثر

لا يعرف

فهو لا يشعر بشىء

جلس يتجاذب معاها اطراف الحديث...اى حديث

انتشله من حديثه صوت سيارة تقف امام المنزل

عرف انهم اصدقائه

انتطلق مستقبلا لهم مع وعد لأخته بان يختصر الزيارة بقدر ما يمكنه

حتى يقضى ما بقى من وقته معها

حاول ان يقنعهم ان يدخلوا إلا انهم اصروا على ان يأخذوه وينطلقوا

صعد ليغير ملابسه...وعاد واخذ مكانه وسطهم كما اعتاد

وانطلقوا

*****

المطار

كان يحاول دائما وهو فى تلك الزاوية

ان يتخيل ما وراء تلك الوجوه

فهذا اب مصرى متوسط الحال...ينتظر فى شغف

ابن...ابنة ....زوجة ...لا يعرف..يتابع الأب وهو يحاول ان يراهن بينه وبين نفسه

وغالبا ما تأتى الحقيقة بعيدة كل البعد عن خيالاته

يسقط احتمال الزوجة بظهور زوجته بجواره

يخرج ركاب الطائرة....ومن طبيعة الركاب واشكالهم تستطيع ان تجزم انها قادمة من بلد غربى

يظهر الابن ويرتمى فى احضان ابيه وامه

قنبلة من المشاعر الصادقة تتفجر فى هذا المشهد

مشهد هو متابعه الوحيد

ومن خلف الابن تتقدم بإستحياء فتاة اجنبية الهيئة

يسلم الاب وتقبل الام

الجميع سعيد...وابتسامة غالية فى زمننا هذا تعلوا وجوه الجميع

يدفع الاب امتعة الابن...بجواره الفتاة

ومن خلفه الام....والابن

ويتركوه لخيالاته مرة اخرى

*****

السيارة الاولى

حين توشك ان تغادر...يودعك الجميع

كلاَ بطريقته الخاصة

انطلق الجمع الى مكان معروف مسبقاً

قطعة ارضل لإبيه على حافة البلدة....اشجار البرتقال...احدى فروع النيل...بعد منتصف الليل

ضحكات من هنا وهناك

الجميع يتفادى الحديث عن السفر

ومن حين لأخر يسمع هذه الكلمة...هتوحشنا

اشتعلت لفائف التبغ......وبدأت بالدوران

اخر ثلاثة ليالى له

كان قد علق فى البلدة الصغيرة بجوار اهله

يتجمع الاصدقاء كالعادة فى العاصمة بعد العمل

ويجدون انسفهم على طريق البلدة

يصلون دائما فى وقت متأخر حتى يضمنون حريته

ويتجهوا إلى نفس المكان

وكأن الجميع قد اتفق

اهله واصحابه....ولفائف التبغ

على ان يأخذ كلا منهم نصيبه منه قبل السفر

*****

المنزل

عاد متأخرا ليجد اخته قد نامت

او تحاول ان تنام..وبجوارها طفلها الرضيع

انتبهت لدخوله....بعض الكلمات واستلقى بجوارها

تذكر حين كانوا اطفال

تذكر حين كانوا جزأ من حياة كلاً منهم

تذكر حين كان يشارك اخيه الصغير نفس السرير

تذكر كم الدفىء الذى يفتقده

وتذكر بشيىء من الندم محاولاته الدائمة والمستميتة للإستقلال بنفسه داخل وخارج المنزل

ادرك حجم الأسوار التى يبنيها الزمن بيديه بينه وبين إخوته

ادرك كم يفتقد هذا الدفىء

و أدرك لماذا هو الأن مستلقى هنا بالذات

بجوار اخته...وطفلها الرضيع

*****

السيارة الثانية

قام فى السابعة ليأخذ حمامه ويرتدى ملابس السفر

بعد نصف ساعة سمع

صوت السيارة التى ستقله واهله للمطار

حمل عنه اخوته شنط السفر وانزلوها

وخرجت امها من حجرتها وقد ارتدت ملابسها لإجهاض اى محاولة لمنعها من الذهاب معهم الى المطار

ودع اخوته البنات

وعمه وزوجته الذين اتوا من المنزل المجاور لوداعه

وانطلقت السيارة تحمله هو وابيه وامه واخيه الأصغر

كان الجميع متوتر..متحمس..متأثر

لا يعرف

فهو فى تلك اللحظات كان قد فقد القدرة على الاحساس

واكتفى بأتسامة خفيفة لا تفارق وجهه

*****

المطار

حين تحين لحظة الوداع....حاول ألا تنظر فى عيون من تودعهم

فقط حاول

حمل امتعته على احدى العربات

واتجه...وسط اسرته

وحين حانت لحظة الفراق بكت امه

وابتسم اخيه

فى حين كان ابوه يحاول ان يقنع رجال الامن ليسمحوا له بالدخول معه داخل المطار

احتضن امه..وابيه واخيه وانطلق هو

وهو يسمع صوت ابيه وهو يخرج كارنيه الجيش ليسمح له بالعبور

ابتسم

وهو يتخيل ان هناك مشاهد مثله تايع المشهد فى محاولة لمعرفة قصته

ابتسم

لأنه ادرك كم يبعد هذا المشاهد ان وجد...عن واقع القصة