"ألراية البيضا "
مفيدأبو الغار..و فضة المعداوى
وأجمل مسلسل من الزمن الجميل
فاكرينه؟
السفير السابق وتاجرة السمك
المبادىء والقيم والثقافة......والسمك والصيادية والعربية الخنزيرة
حلقة شفتها صدفة...رجعتنى سنين ورا
أفتكرت قد ايه كنت متعاطف مع جميل راتب وهشام سليم وسمية الألفى
مع الحق ضد الباطل
أفتكرت ازاى كنت بتقطع وسيد زيان بيكسر التحف التاريخية الموجودة فى الفيلا
ازاى اتأسرت بيهم...وشفت نفسى فى المستقبل واحد منهم
إنسان صاحب قضية
قضية ضد الفساد..والبلطجة...وكل حاجة غلط
كنت صغير
بس قلبى كبير...وطموحى اكبر
وأحلامى ميسعهاش حدود الكون
واحد قال مرة...لما تشوف نفس المسلسل أو الفيلم..أو تقرا نفس الكتاب بعد فترة
بتاخد يالك من حاجات جديدة
بتشوفه بصورة تانية
العمل الأدبى نفسه متغيرش...أنت إلى اتغيرت
لما شفت المسلسل ده زمان..شفت نفشى هشام سليم
كان رسام...نفسه يسافر إيطاليا يكمل تعليمه
مش فارقة معاه الفلوس..أو تفكير المجتمع المادى اللى كانت بتمثله سميحة أيوب
دلوقتى
يااااااااااااااااااااااااااااااااااااااااااااااااااااااااااااااااااااااااااااااااااااااااه
حاجة بعيدة أوى عن اللى حلمت بيه
واحد.....اتمنى انه يكون لسه واقف فى النص
بين الصح والغلط
حتى المجتمع بتاعنا فى مصر نفسه اتغير كتير
فى الوقت اللى كانت واحدة زى فضة المعداوى دى ظاهرة
وحاجة غريبة..ومستنكرة..عشان عايزة تشترى فيلا ليها قيمة تاريخية
وتبنى مكانها عمارة
دلوقتى الناس بالألف بتموت فى عبارة...أو تولع فى قطر
ولا حد اتفاجىء
اتعاطف...غضب..ممكن
بس متوقع
عادى.....كل حاجة عادى
" هما عايشين تحت الأرض...وإحنا فوق الأرض بنكح تراب"
انا رفعت الراية البيضا بدرى
بدرى قوى
من أول من أخترت كلية...بناءً على الشغل..وفرصة العمل
الوضع اللى اتغير على ما خلصت الكلية
عارف...ان مش انا بس اللى رفعت الراية
البلد كلها يمكن
بس بشوف نفسى زمان..فى لحظة زى دى
وقد إيه كان واضح بالنسبالى الصح والغلط
اللى عايزه...وإللى رافضه
دلوقتى..مش عارف افرق بين الأبيض ...واى لون تانى
لدرجة انى خايف لتكون الراية اللى رافها فى كل حتى
فى شغلى...مع أهلى..والناس اللى حواليا
تكون مش بيضا
ويفتكرونى من اتباع مفيد أبو الغار
مع انى من جوايا
بقيت فضة حتى النخاع
وعجبى
*************************************
*************************************
مش مهم
كنت مين..وحلمت إيه
مش مهم
حسيت بمين
وفهمت مين
وحلمت تكون فى لحظة فين
مش مهم
مش مهم ازاى بدأت
المهم فضلت واقف قد إيه
لما اتخنقت..؟
كام يمين حلفها عقلك
لما لامو القلب مرة
عشان ضعفت..؟
مش مهم كام نجم شدك
ولحد امتى فضلت قاعد
فوق سطح بيتكم
عمال تعد
والبرد شادد
وفضلت قاعد
قد إيه......؟
الف يوم
ولا جريت لحضن امك
لما شافت عينيك غيوم..؟
قلت يمكن أبل نفسى
أتلم احسن...وألم نفسى
ومش مهم
مش مهم...كام نجم شفته
المهم لو عرفته
ووقفت..وسط الميه وحدك
مستنى لما الغيم يعدى
وقفت ولا.........؟
جريت وقولت بكرة بدرى
أرجع وأعيد من تانى عدى..؟
وكأن بكرة شايفه قلبك
عدْ تانى
وقفت فين يابو عقل مادى..؟
ترجع..تعد...ترخى...تشد
ولما الغيم...يهل...هدْ
ويعدى يوم
من بعده يوم
ولألف يوم
وانت ناسى..يابو عقل راسى
انك عشان توصل للنجوم
لازم المطر يبل الهدوم
5 comments:
فعلا احنا اللى بنتغير مش الحاجات اللى بنشوفها ولا اللى بنقراها
متتجمدش عند حلم واحد لو اتغيرت الظروف غير حلمك بس افضل احلم اوعى تبطل تحلم
الحلم مهما كان بعيد هو الحاجه اللى بنكون عايشين علشان نحققها .. نسعى لها
زياراتى لك دايما بتثرينى فكريا
سلم قلمك
كلام موجوع و يوجع
وحتى الوجع بقى عادي مش حاجة تخلينا نقف ونبص حولينا
بس لأ احنا شايفين حولينا كويس قوي
بس شايفين زي مش شايفين.. مافيش اي رد فعل
مش عارفه انا من كتر اعجابى مش لاقيه كلام اقوله
وجعت قلبى وانا بقراه
وخلتنى ابتسم فى نهايته الجميلة
وانت ناسى..يابو عقل راسى
انك عشان توصل للنجوم
لازم المطر يبل الهدوم
تسلم ايدك بجد :)
فان جوخ
شكرا على زيارتك نورتنى
عايزه ااقولك انك لوبقيت زى فضه المعداوى حتى النخاع زى ما بتقول ما كنتش كتبت البوست اللى يوجع القلب ده لان فضه المعداوى كانت هتبقى مبسوطه بااللى هى فيه لكن انتقلبك وضميرك بيعاتبوك ومش هتبقى فضه المعداوى ابدا هتفضل بفكر مفيد ابو الغار وهشام سليم لان دول اللى كونا فكرك واعتقد ان الوجدان والضمير بيتشكلا فى الفتره المبكره وبيفضلوا جوانا مهما حاولنا نلبس قناع بيضل الشكل الاول هولحقيقى والباقى زيف
تقبل تحياتى
مرحبا / فان جوخ
لقد قام أحد المعجبين بمدونتك بإضافتها إلى تدوينة دوت كوم، بيت المدونات العربية.
قام فريق المحررين بمراجعة مدونتك و تصنيفها و تحرير بياناتها، حتى يتمكن زوار الموقع و محركات البحث من إيجادها و متابعتها.
يمكنك متابعة مدونتك على الرابط التالى:
http://www.tadwina.com/feed/1573
يمكنك متابعة باقى مدونات تدوينة دوت كوم على الرابط التالى:
http://www.tadwina.com
لعمل أى تغييرات فى بيانات مدونتك أو لإقتراح مدونات أخرى لا تتردد فى الإتصال بنا من خلال الموقع ونرجو منك مراسلتنا للأهمية على الايميل
Tadwina@gmail.com
لوضع البانر الخاص بنا على الصفحة الرئيسية لمدونتك حتي يستطيع قراءنا في مصر والوطن العربي من متابعة تدويناتك المستحدثة
و لكم جزيل الشكر،
فريق عمل تدوينة دوت كوم.
http://www.tadwina.com
Post a Comment