هل املك من الشجاعة ان اكتب عنكِ..؟
***
ايه هوه الحب...؟؟
نوع من انواع الضعف
ضعف تحبه اكتر من اى شيىء تانى
طب ليه ضعف...؟؟
لأن ببساطة انا كراجل...المفروض انى انسان قوى
قوى فى الشغل ...فى الشارع...فى البيت مع اهلى...حتى مع اصحابى المفروض اكون قوى
اظهار الضعف فى اى من المشاهد دى بيسبب مشاكل اكتر من الراحة اللى ممكن تعود عليك
الراحة اللى بتيجى لما تعيط مثلاً
وانا مبعرفش اعيط
ايمان...؟؟
مين ايمان...؟؟
بنت وحيدة عايشة مع امها لأنها من اول ما كبرت وابوها مع زوجة تانية
دايما اغلب القصص دى بتبدأ بإنفصال
الأب اتجوز...وساب الام مع البنت
الام ربت البنت على كره الأب...واى اب...واى راجل
بس فجأة ظهر عريس للأم....وفجأة الأم وافقت
واتقلب الموقف المقدس المعادى للرجال
طب ايمى....كان عندها 17 سنة فى الوقت ده
فوجئت براجل غريب فى البيت و بأمها بتتخطف منها
طب هى اصلاً صدقت العقَد اللى كانت امها بتحاول تزرعها فيها
لا...قالت اشوف بابا واحكم
اشوف الرجالة واحكم
حاولت تشوف أبوها...راحت لبيته التانى رد عليها من ورا الباب
وكانت صدمة ليها انه حتى مرضيش يقابلها
شوية الاب تعب ودخل المستشفى فى حالة خطيرة...طلب يشوفها وكان السبب فى الطلب ده انه كان عايز يوصيها على اخوتها
من الزوجة التانية...ما ايمان كبرت...وممكن تشيل مسئوليتهم لو حصله حاجة
ومحصلوش والحمد لله
وكانت دى اول واخر مرة تشوفه
طب الأم....؟
بسبب سن ايمان...وبسبب التنازع على اهتمام الام..ووقتها بين الزوج الجديد والبنت
قرر الزوج انه يستقر فى بلد اهله فى الفيوم....والام تعيش على خط القاهرة الفيوم
والبنت تبات لوحدها عادى
ما ايمان راجل
ومبتعملش حاجة غلط...والتليفون موجود
تحس كدة انه فيلم عربى قديم
لسه فى ناس كدة
طب ايمان....؟؟
فى جو الكلية او المعهد معرفش لحد دلوقتى بس عموما عرفت ناس وشباب وخروجات و و و
بحدود...ايوة بحدود
بس اى حدود...؟؟
حدود الدين ولا الأسرة ولا المجتمع...؟؟
واشتغلت فى مكتب سفريات...وبدأت تدوب فى الدنيا إلا برة البيت
البيت اللى مش موجود
اتعلمت ازاى ان اى راجل بيقابلها او حتى شاب بيبصلها ازاى
ووسط شلة بنات جمعتهم نفس الظروف
شافت وعرفت وشربت
بحدود برضة....!!!؟
وبعد كل ده
قابلتها انا
لسه مكملتش 22 سنة
جميلة
شكلاً وشخصاً
عمرك ما تزهق وانت معاها
جميل
وبعد كام مقابلة عرفت القصة دى حته حته
تعاطفت معاها لأقصى درجة
وحاوت بكل الطرق والكلام انى اقولها ان الدنيا كدة
وان كل الناس اللى انتى شايفاهم حواليكى دول
مهما كان مستواهم فمشاكلهم اكبر مما تتخيلى
حاولت
وهى بإصرار حاولت تحسسنى اكتر بمأساتها
العلاقة بينا كانت مش اكتر من خروج وسهر فى اماكن عامة سوا
ممكن كنت بحاول اعوضها
ممكن كنت مستمع بانى اساعد انسان اضعف منى
بس العلاقة بدأت تخش فى سكة مش بتاعتى
خفت تتعلق بيا وانا اصلا سايب البلد وماشى
وهى عارفة ده
حسيت انها بتتعمد تكسب تعاطفى نحيتها...ممكن لانها عارفة انه السبب الأول فى استمرار العلاقة
وبدأت احس انى غلط
وبدأت احس اكتر انها بتتعمد كل كلمة بتقولها
عارفة بالظبط الكلمة دى هتسمع عندى فين
والانسان لما يكون ضعيف فى جانب من شخصيته بيحاول دايما انه يخفيه
لأنه عيب دائم...مثلا لو اتولدت لقيت ابوك تاجر مخدرات مثلاً
مش هتمشى تقول لكل الناس انا ابويا كذا ولا كذا
ويمكن كانت زى كل البنات اللى عرفتهم على اختلاف اشكالهم وثقافتهم
بتحاول تحطك فى خانة العريس
حتى لو ظروفك غير ظروفها...حتى لو عارفها فى الشارع
بتحاول...وبسهولة بتعرف انك مش منهم
فتبقى اى حاجة تانية انت عايزها غير فكرة العريس دى
تبقى صاحب...حبيب...عشيق
انت وحدودك...وهى وحدودها
المهم اختفيت...بعد موصلّت تقريباً كل الكلام ده ليها بطريقة او بأخرى
خايف عليها...انا مش هاخسر حاجة بس لا
مش هيبقى ابوها وامها وجوز امها وكام واحد قبلى وانا عليها
حتى لو بإرادتها
قفلت موبايلى واختفيت...وهى فهمت ده
وساعدنى انى سبت شغلى استعداداً للسفر
عرفتها 3 شهور
واختفيت 3 شهور
قاومت فيهم الأحساس الغبى بالوحدة اللى عايش جوايا
وقررت انى مكسرش قاعدة رقم اتنين
" لا تستعدى علاقات من الماضى "
بس عن طريق صاحب مش صاحب
جابت هيا نمرة البيت...واعلنت انها مش هتستسلم
اما انا...؟؟
اتلككت وكلمتها تانى...وقابلتها تانى وتالت ورابع
سفرى اتأخر...والقاعدة رقم اتنين غابت وراء الشمس
***
فى ناس لما تقابلهم يأسروك بحاجات معينة فيهم
ماهو مش لازم تفضل انت الواد الجامد الصايع اللى قلبه من يوم اتكسر وهوه زى الحجر
فاهم الناس كلها
وجايب من الأخر
انا اصلا مش كدة
وايمان برغم انى عارف ومتأكد ان فى حاجات كتير جداً فى حياتها مخفية عنى
إلا انها شدتنى
شدتنى بعد فترة عرفت فيها بنات كتير
شغل وعيلة وأصحاب
وولا واحدة شدتنى اصلا انى اخد نمرة تليفونها
طب ايمان وحشة ولا حلوة...؟؟
فى نظرى حلوة
ولو كنت مخدوع....فانا مبسوط
لأنى بقالى فترة كبير متخدعتش
***
عارف الناس اللى لما تجيب سيرتهم عينيك تلمع
عارف الناس اللى بتكسر قاعدة فى حياتك عشنهم
بلاش
عارف ايمان..؟؟
اللى لو كنت قابلتها فى ظروف غير دى
وفى زمن غير ده
كنت ممكن تقرا كلام تانى خالص هنا
اديك عرفت
***
"ايمان....اسف لأنى مقدرتش اسيب فى حياتك غير شوية ذكريات...اتمنى انها تكون سعيدة"
24 comments:
اسف لا تكفي
لن تكفيها
):
عود أحمد فان
:)
اعتقد بالفعل
انها لن تكفيها
لكن اشعر بتلك الكلمه هناك فى غياهب ذلك القلب
الذى تذكر ايمان
ربما لن يقابلها ثانيا وربنا يقابلها على استحياء
وربما
........
لكن اعتقد ان هناك شئ ما يحمل فى قلبك اسم ايمان
تحياتى لسردك الجميل
فان جوج
لا تغيب
اعتقد ان الأسف في هكدا حالات لا جدوى منه ياعزيزي
لا تتأسف لها
فهناك شيء اكبر منك ومنها يجمعكم غصبا
أستفق فسباتك مجرد سراب
السلام عليكم
ياريت فعلا تكون ذكريات سعيدة
أنت حتنشغل وتنسى
وهى كمان اكيد حتنسى
بس حاول تطمن عليها من بعيد لبعيد
كنوع من انواع الصداقة مش اكتر
من غير اكيد ما تحسسها
لكى لا تتعلق هى بالوهم
***
على فكرة أسلوبك انت اللي حلو مش انا
تحياتي وسلاماتي:)
العزيز فان جوخ
إذا كنت تركت لايمان شويه ذكريات
فالأكيد انها تركت لك الكثير
تمنياتى لك بالتوفيق
وربما خبأ لكم الزمان اشياءا كثيره
تحياتى لك
فان
الحب ضعف.. صح
لكن هل كل أنواع الضعف مرفوضه
وهل كل أنواع الضعف المرفوضة .. مرفوضة لدى كل الناس
أقصد إن ضعف الرجل في الحب هو سر حنانه و سر أسره لحب فتاته
و إن كان ضعفة مرفوض لدى كل الناس فهو مقبول جدا لديها
ده بالنسبة للكلام عن الضعف
أما الكلام عن الحب فأنا مش مؤهلة إطلاقا للحديث فيه عشان أنا حاخربها لو إتكلمت.. وأساسا كل ما أبص جواي كده و أقول ايه أخبار الحب عندك ألاقي صمت شديد
لكن.. الدنيا غريبة يا فان.. بتلف لفّات و تجيبك من ورى لقدام ومن قدام لورى و تحطك في سكة ناس وتاخد ناس من سكتك و نسّيك ناس بالعافية و ترجع تزرعهم قي طريقك
ومهما خططت أو توقعت في الآخر القرار الأخير لددنيا
للنصيب
ربنا يسعدك و يهون عليك ... إنت من اللي يتخاف عليهم من نفسهم مش من أي حاجة تانية و انا مصرة على رأيي ده
ازيك يافان
الاول انا مش عارفة أقولك ايه
بس انت بجد لو بتحبها خليك معاها
كمل معاها
لكن لو حاسس بان اللى بينك ويبنها مجرد صداقة او مشاعر زائفة يبقي متكملش
بس بلاش تكسر قلبك ولا قلبها
لو كانت بتحبك بجد
وانت بتحبها بجد
ربنا معاك
ويقويك
جميلة قوى
انا مريت بتجربة مشابهة جدا
مش عارفه ان كنت فهمتك صح اوغلط
بس سعات الواحد بيكون في وضع مضطر فيه انه يكمل مع الانسان الي قدامه يا فان
يعني بتحس بتأنيب ضمير لو ابتدعت عنه
بتحس انك مسؤل عنه في كل شيء
صحيح عمره مايكون دا هو الحب
بس دا الي بيحصل يا فان
عمر الحب ما تحس انك بتتارجح فيه بين ايوه ولا
بتحس انك موجود مع الشخص دا بملا ارادتك
وعمرك ما ترجع تتردد ابدا بين انك تفضل معاه او انك تسيبه
التردد دا عمره ما كان حب ابدا
فان عايزه اعرف اخبارك ايه
عامل ايه دلوقتي
وسفرك اخباره ايه
وعايزه اطلب منك كمان انك متختفيش كدا من وقت للتاني طمني عليك لو سمحت
عارفه انك ملغبط من موضوع السفر
بس خليك بالجو عشان مينفعش كدا ابدا
طمني عليك بجد يا فان
ربنا معاك
بجد اسلوبك في السرد ممتع ومؤثر .. عن جوهر البوست فشئ صعب ، اذكر الان عبد الحليم وهو يغتي : علي طول الحياة نقابل ناس ونعرف ناس ونرتاح وياي ناس عن ناس ، وبيدور الزمان بينا ، يغير لون ليالينا ، بنتوه بين الزحام والناس ولا ننسي حبايبنا اعز الناس ... مين بقي هم من نستطيع ان نشعر معهم بانهم اعز الناس .. مش عارفة
فان جوخ
اول حاجة بس انا مبسوطة انى بقرالك تانى بجد كتعرفش كلامك بيسعدنى ازاى
بالنسبة لايمان ولا الحب الضعف الاول
نبدا بالضعف طيب هتضعف بس بيختلف هتضعف مع مين يعنى لما تضعف قصصاد حد ضعفك ده هيكون حاجة غالية اوى عليه ويحسه اوى ويعمل المستحيل عشان يخليك تقوى وبيحب ضعفك يبقى مش ضعف ومبتجيش المرحلة دى الا بعد فترة معينى
فلا هو ضعف اه بس هو خوف لو سابك الحد ده وشاف ضعفك بتحس انك اتكشفت كده اصاد حد حتى لو من نفسك
ايمان
لو فكرنا سوا يا ترى اسف هتنفع؟؟طيب كان لازم قولى ليه وبجد عشانها زى ما انت قولت مينفعش تكمل لانك مسافر وانك مش هتقدر نكمل وان فى ظروف اصلا تمنع الموضوع وانك من جووه مش مستعد ووانك وانك
هى شافت فيك حد سمعها صح حسها اوى اتعلقت بيك وهتحاول تانى وتالت هى اصلا مش عارفة عاوزة ايه؟
يا ترى عاوزاك تبقى ضهر ليها من حجات كتير .
عاوزاك تبقى جنبها وتحس بيها وهى تشكيلك او او
هى هتدور بس انت اجمد حتى لو كملت مش هينفع يبقى ليه تزود لجرح اتنين
يبقى جرح انك سبتها
وجرح انك هتبقى لسه عندها
سعات الانسحاب بيبقى حل سليم بس مش ضعف لان الاستمرار هيضعف اكتر واكتر
تحياتى يا فان جوخ
عارف أنتا قسيت عليها اوى فاكتر من حاجه...ايمان حاسسه انها مفتقده الاهتمام فى كل اللى حواليها وحاسسه انها عاشت مأساه ومحدش حاسس بيها غيرها واكيد فرحت جدا بحد حس بالمعاناه اللى هيا عايشاها اوك وكمان هيا من جواها انسانه كويسه واكيد كانت بتحاول تبينلك انها محترمه موش زى مانتا فاكر عنها عشان هيا اساسا مفتقده الاحترام ومبتهتمش انها تثبت لحد انها محترمه او كويسه لان محدش مهتم اساسا وانتا كدا بمنتهى البساطه استهانت بكل دا وفسرت تصرفاتها على انها عاوزه تحطك فى خانه العريس....عريس ايه وجواز ايه بس اللى هتفكر فيه اكيد كل اللى هتعوزه مالدنيا شويه حب ولو صغيرين واهتمام وموش هتعوز حاجه مالدنيا اكتر من كدا
nada
ربما لن تكفيها
والاكيد انها لم تكفينى
اكبر صحفية فى مصر
شيماء الجيزى
اشكرك على المرور الدائم على فان
ولن تدركى الى اى حد يتذكر هذا القلب تلك الانسانة
نورتينى
linda
كان لابد من الاسف
لها و لنفسى
لأن قليلاً جداً ما انست نفسى لأنسان مثلما انست اليها
ربما كنت اعتذر لنفسى اولاً
ثم لها
شرفتينى و اتمنى اشوفك تانى
مش قادرة
كان نفسى الظروف تسمح لى انى اكون موجود فى حياتها كصديق
ولكن على قد ما اتنميت ده
على قد ما عملت المستحيل عشان ميحصلش
مجنون
نورتينى
العزيزة
loumi
من ناحية تركت لى الكثير
فهى تركت الكثير والكثير
اشكرك على مرورك
وعلى رأيك
hannoda
اخر كلمة هى اللى جابت من الاخر
الواقع اصبح اسوء بكتير من الصورة الجميلة اللى كنت بحاول ارسمها
والضعف وصل بيا لسكك عمرى ما دخلتها
وخرجت بالنتيجة دى
انا اخطر الاعداء على نفسى
نورتى مصر
:)
عاشقة الوطن
مش عارف اقولك ايه
بعض الحب لو لم نجده على الأرض لأخترعناه
نزار قبانى
hesterua
نورت المدونة
واتمنى اشوفك تانى
جهينة
بفرح لما اشوف اسمك عندى
وردى رديته هناك عندك
خليكى دايما بالجو
ward
عايز اقولك نزلت الأغنية وقاعد اسمع فيها
شرفتينى بزيارتك اول مرة
واتمنى انها تتكرر
فان
ana keda
تفتكرى لو الانسحاب اتأخر هيحصل ايه؟
بلاش
لو الأنسحاب اتأخر يبقى معناه ايه؟
عارف الصح من الغلط
لو عملت الغلط ابقى ايه؟
بحب...؟؟
ممكن...؟؟
بعد كل الظروف واللى قولته ليكوا واللى مقولتوش
مش عارف
عاجز
sonia
قسيت عليها
بس هى دبحتنى
Post a Comment