الطير المهاجر..ورحلة البحث عن وطن

غريب أوى التغير اللى بيحصلنا بمرور الوقت

تتغير الظروف..وعمرك يزيد كام رقم

تلاقى نفسك واحد تانى

من صغرى وانا بحب بلدى

ممكن زى أى حد...ولما وعيت وفهمت شوية

حبيت عبدالناصر

وزمنه...وأحلام الوحدة..واننا نقول.....لأ

لما دخلت الجامعة...كانت أحر مناقشة تشوفها بينى وبين اولاد الخليج

المصريين اللى اتربوا فى الكويت أو الأمارات

وتذمرهم المستمر من البلد..الفوضى..الفساد...الزبالة

وكنت اتجنن لما حد منهم يقول انه حاسس ان بلده مش مصر

بلده اللى اتربى فيها

على أخر سنة فى الكلية كانت حدتى عموما ابتدت تقل

وأرأى العنيفة ابتدت تاخد اتجاه تانى

ابتديت اتخنق من البلد

ومع دخولى عالم العمل

حطيت اول وأخر هدف ليا لحد دلوقتى

إنى أسيب البلد دى

اتغرب كام سنة...واحوش قرشين ابدأ بيهم حياتى هنا...قصدى فى مصر

والغريب إن أصحابى اللى كنت بتخانق معاهم وبتهمهم بعدم الإنتماء (اولاد الخليج) كانوا ابتدوا يتعلقوا بالبلد

وفى الوقت اللى أهلم كانوا بيطالبوهم بعد إنتهاء الدراسة بالعودة للبحث عن عمل

كانوا بيموتوا عشان سايبين مصر

أشغلت وخدت الخبرة اللازمة وسبت البلد

وعلى قد ما سعيت لده

على قد ما بكيت وانا باستلم تصريح السفر

حسيت فى اللحظة دى بس إنى مسافر

سايب البلد اللى ياما قلت بحبها

وقاعد فيها بزبالتها وفسادها وكل مافيها

اللى قلت زمان انها مش حتتصلح إلا بينا

جيت على السعودية

غربة...خنقة...مجتمع مختلف كتيييييييييير عن مصر

أحسن أو اوحش ده مش مهم

بس مختلف

وللأسف ابتديت احس إنى بتغير

من ناحية الشغل كان تغير إجابى..لأن ببساطة مفيش فى حياتى حالياُ غيره

بس النواحى التانية مش عارف

أول أجازة نزلت فيها مصر بعد السفر بستة شهور

كانوا اربع أيام شغل

مروا بسرعة

بس شفت الشتا فيكى يا بلد..وسمعت نجوم أف أم

وحضرت الفالنتاين

تانى مرة كانت شهر..بعد سنة من الغربة

كان الغريب فى الأجازة دى

إنى قضيت اول 12 يوم بسمع بس

والناس اللى حواليا مش فاهمة مالى

وانا نفسى مش فاهم

ساكت..بسمع...مضطرب احيانا

مش متعود على العدد الكبير ده من الناس اللى بتحبها حواليك مرة واحدة

ماهو الغريب ان الناس كلها بتوحشك فى الغربة

بتفتقد كل حاجة حلوة فيهم

ومرة واحدة أهلك..أصحابك..النيل ..والليل..السهر

فى خطوبة واحد صاحبى...اللى على أخر الأجازة خسرته

خفت ارقص

حتى ولو دقيقة

حاسس ان الناس كلها بتبصلى

على اخر ال12 يوم رحت لدكتورة نفسية

وملقتش عندها الراحة

تانى سنة قربت تخلص

والمشكلة اللى عشانها بكتب كل ده

(أه يا مدونتى...ياللى مبكتبش فيكى الا المشاكل)

انى دلوقتى وقت الخطوة التانية فى حياتى

اللى مش عارف هية ايه

اللى شايفه قدامى دلوقتى واحد من تلاتة

اما اقعد اكمل هنا فى الشركة اللى بشتغل فيها

وهنا مشكلتين

الترقية مش مضمونة لأنها على اللى الواحد شايفه بتعتمد اكتر مش عليك على غيرك

واسطة...like and dislike...حاجات كدة

تانى حاجة..إنى فعلاً مش هقدر اكمل فى الرياض كام سنة كمان

انا دلوقتى بموت

والترقية
(اللى مش مضمونة)

معناها خمس ست سنين على اقل تقدير فى مملكة الخوف

تانى سكة ارجع مصر

:)

كان نفسى والله...بس مفيش مكان

الهوا فى مصر مبقاش صالح للأستخدام الأدامى

شغل فين..وهتاخد كام..وهتعمل ايه..وتتجوز ازاى...وتربى ولادك وتعلمهم ازاى

مصر مش واردة

تالت حاجة ودى اللى العقل بيأيدها

هجرة

استراليا مثلاُ

مش هجرة هجرة...تطلع تدرس..تشتغل..كام سنة وترجع بلدك حاجة جامدة

مش قادر

شايف ان دى خطوة منطقية

بس مش قادر اخدها

ترجع بلدك بعد كام سنة بقرشين..ولا بمية ومعاهم شهادة من جامعة معتبرة

تعيش نقول عشر سنين فى استراليا...وترجع بتتكلم كام لغة

ولا تقضيهم فرضياُ فى السعودية وترجع عندك تخلف عقلى

وولادك يكونوا خلاص ربوا عقد صعب يتعالجوا منها

(انا شايفها كدة)

المشكلة فى موضوع استراليا ده انى لما سافرت اوروبا مع الشركة..حاسيت بغربة اكتر بكتير من اللى فى الخليج

غربة كانت هتموتنى

فكرتنى بإيام زمان لما كنت اطلع معسكر مع المدرسة فى الصيف

يومين وكنت بموت عشان ارجع بيتنا

حاجة تانية

بعد التعود على الحياة فى مجتمع زى استراليا...هتقدر ترجع

طب ولادك

اللى هيكون معاهم الجنسية...هيرجعوا؟

طب لو رجعوا هيكملوا؟

واحد صاحبى قالى هما لما بيدوك الجنسية سواء فى استراليا أو كندا

هما عارفين كويس انك مسلم..مصرى...أو عربى..عمرك ما هتكون كندى

متربى فى بلدك....ومشبع بتقاليدك

هما بيراهنوا على الجيل التانى...أو التالت

الكلام ده وجعنى

وافتكرت برنامج شفته على الجزيرة..بيحكى عن المهاجرين العرب

وازاى ان الجيل التالت هو اللى بتنقطع عنده العلاقة بينه وبين الأصل

وأفتكرت ..ان الجيش الأمريكى اللى دخل العراق...20% منه مسلمين

طب ايه.....؟؟

********

حاسس انى فى صراع جوايا...بين ما كان بداخلى

وما صار الأن فى عقلى

حاسس اكتر انى بقيت مركز فى الطبقة الخارجية منى

حاسس إن فيه قشرة حواليا

وإنى مركز فى القشرة دى

زمان...كنت بحس انى جوانى قوى

الرجل الذى أكل الهوة

عاد من عمله فى السابعة

ساعة...وكان يحتضن التليفون فى ركن مظلم من البيت..وصوتها يأتيه كالعادة

كانت تكلفهما تلك المكالمات كثيراً

يتحملوها بحب...رغم اليزانية المحدودة

سارت المكالمة بشكل طبيعى..و إنتهت بشكل درامى

فى لحظة ما..خرج عن النص المعتاد

فجأة..تحول الضحك إلى تنهدات منه ..وبكاء منها

وهو يحاول ان ينهى كل شيىء للمرة الثانية

كان يشعر ان كل ضغوط الدنيا فوق كتفيه

شعر انه يظلم نفسه...وافترض أنها لم تكن يوماً من المضحين

بكاء..بكاء...والف وعيد منه ان جاءت إلى مقر عمله كما فى المرة السابقة

وانتهى كل شيىء

****

كانت قد تربت فى السعودية

وعاشت تحلم بقصة حب...وبحبيب..يترك كل نساء العالم من أجلها

ادرك ذلك....وكذب ليكون هذا الحبيب

ليرضى ذلك الطموح بداخلها

كذب حين سألته عن علاقاته النسائية قبل ان يعرفها

كذب حين قال انه ذاب قى قبلة من قبل

وبفضول" كان يقتله" أصرت ان تعرف التفاصيل

فنسج قصة وحكاية..وقبلة مزيفة

بعد ان مات الفضول...دمعت عينيها...فقد كانت تأمل ان تكون هى..أول من يقبلها

وندم لأنه لم يكن صادقا

***

كان يخاف ان لا يرضى طوحها فى حبيب مجنون عاشق

كانت تحكى له عن عشاق صديقاتها..وكيف يبتكرون

فهذه تفتح نافذتها فى الصباح لتجد بالوناً ضخماً..يحمل أسمها..فى الساحة الكبيرة أمام البيت

وهذه..وهذه

تمنى ان يفاجئها هى ايضاً

ان يشبع تلك الأحلام التى عاشت بها فى بلد مغلق

ولكنه..لم يكن يملك المال...ولم يكن يملك الجرأة

إلى الحد الذى لم يكن ليستطيع ان يفرط فى حديثه معها وسط أصدقائه

كان يخجل..يتهرب

ذات يوم..وهو جالس على مقهى بصحبة أصحاب...بجوار بيتها

طلبت منه ان يكمل حديثه معها من اسفل منزلها

ترك كل شيىء..واتجه إليها

رأته يدخل الحديقة القابعة امام منزلها من الطرف الأخر

شعر بسعادتها تكاد تسقطها من الدور الثالث

تقدم حتى أصبح أسفل المنزل تماما

عشرة دقائق مرت ....دون ان تنطق بكلمة

سعيدة.......تضحك..وقلبه يضحك

أخبرها انه يرى ذراعيها..من حيث يقف

فأسرعت بخجل لترتدى أى شيىء

عاد وهو سعيد

ولكن كان يؤرقه انها هى التى طلبت ذلك

أو...انه لم يفعل ذلك من تلقاء نفسه

ربما لم يكن ليفعل قط

فهو يحمل هم العلاقة...أكثر منه يحاول ان يستمتع بها

يفكر فى غدا..أو بعد غد

أو فى اليوم...الذى لا يملك من المال ما ينهيه به

*****

كانت تعرف انه طالب من الأقاليم...من مدينة كذا

فى حين كانت الحقيقة انه من قرية بجوار تلك المدينة...تدعى كفر كذا

لم يخبرها..كما لم يخبر معظم من كان حوله

عدم ثقة بالنفس....إحساس بالنقص

أو كما كان يحدث نفسه

ان لا أحد " ولا هى بالطبع " يدرك الفرق بين كذا...وكفر كذا

اما ما بين كفر كذا...اهله...عائلته.....حياته

وما بين كليته...حبيبته.....أصدقائه

هوة كبيرة.......تأكله كل اليوم فى رحلة العودة إلى القرية

هوة مادية....إجتماعية........هائلة

أو ......هكذا كان يراها

ذات يوم......قالت له بعفوية

انها تفرح حين تفكر كيف ستخبر أهلها عنه وعن بلدته

والحمدلله.....أنها ليست كفر..أو قرية......الحمدلله أنها مدينة

أحمر وجهه.......ولكن من الداخل فقط

****

حين قرر ان يتركها

كان يهرب من الواقع..من المواجهة

من كل الكذبات الصغيرة...التى بذلها ليحافظ عليها فى حياته

فهى من كانت تعطى له التوازن الازم لعبور الهوة كل يوم..وكل ساعة

ولكن فى النهاية

سقط....أكلته الهوة العميقة بين ما كان...وما أراد ان يكون

أكلته

أو أكلها هو

فصار من بعدها.........كمن يحمل الفراغ بداخله

قلبٌ ..حُر

وعشقتُ الرسمَ منذ الصغر

أن أرسم فوق الأشياء

ان أنشر وصفك بالأرجاء

فرسمت الكون بفرشاتى

أوراق خريف...وثلوج شتاء

اترك فى كل مكان شىء منى

قلب عنيد

وجه طريد

نوبات جنون....وأصوات بكاء

****
ورسمت وطنى بلا ألوان

نهرٌ أزرق....ورمال

ووجوه اناسٍ تعرفنى

أطياف عبيد...وانصاف رجال

وعاصمة...تجمع أشلائى

من هول الغربة والترحال

وتركت حدودى بلا حراس

ورسمت باباً..يحمل اسمى

وطريقٌ....وعدة أفراس

ووضعت نيران تُرشِدُكِ

وكتبت وعودٍ...فوق الباب

" من غيرك...أعتزل الناس "

ومضيت لعاصمتى وبعينى

شوق...أحزان..ونعاس

فرسمت سريرا...مدفئة

ولهيب يدفىء أطرافى

وتركت لأجلك...كلمات

وبهدوء تخبو الأنفاس

****

الون الأخضر..قد غطى كل الأشياء

وعبير فتاة...تتفحص كل الأجزاء

ما هذا الباب...؟؟

وحروف رسمت من زمن

وبقايا...حريقٌ..أو نارٌ

تعبر فوق الرسم..لتدخل

لطريق...بين الأشجار

ومن بين الأفق..تترأى

عاصمة بلا أسوار

يغمرها شعور بالألفة

تتقدم..فوق الأحجار

أحلام كانت تنبئها

بوصول رفيق المشوار

تدخل...توقظه..فيحملها

ويصيرا سر الأسرار

الأن تدخل حجرته

العتمة...ورائحة النار

استيقظ قد جئت إليك

استيقظ...؟!؟

تكشف عن وجهه...فتدركها

حقيقة الأمر فتنهار

قد مات الفارس...من زمن

ولم يبقى غير الأعذار

تجلس بجواره...وعينيها تقرأ كلماته

" لا تبكى..فالموت لا يقتل قلبً "

"قد عرف عشق الأحرار"

هكذا رأيت بيروت

أريدكِ حقيقة......؟

دخل المكان فجأة

كانت حركته سريعة..أقرب إلى مضطربة

أخذ قهوة خالية من أى شيىء

واتجه فى ركن مظلم...بحيث يرى الجميع

ولا يشعرون به

فتح جهاز الكمبيوتر المحمول الخاص به

وبدأ يكتب

****

ما أكثر الأماكن اللتى تمنيت ان تكونى معى فيها؟

ما أكثر الاوقات التى ضربتنى بها الوحدة...فإفتقدكِ؟

لا أعرف لكِ شكلاً

ولكنى احمل ملامحكِ فى قلبى

اراكِ فى احلامى ...حين اكون محظوظاً

أخر مرة رأيتكِ...كنت قاب قوسين أو ادنى

من فقدان الأيمان بوجودكِ

ففرحت...أحسست انكِ تأتينى كلما اوشكت على الكفر بكِ

وأحسست بالخيبة..بالتعب...و كأنى كنت أرغب فى الا اركِ مرة اخرى

فى ان اكون كما يريدونى الناس

مثلهم...غير مؤمن...غير مهتم

****

من حين لأخر

يتوقف عن الكتابة..وينظر حوله

يتأمل الناس فى المكان

يبحث عن حبيبته........؟؟

لا

يبحث عن قصة حب

تعيد الهدوء إلى قلبه

تعيد الثقة

والأمل فى يوم جميل قادم

****

ستة وعشرون عاماً..هى عمرى فى هذه الدنيا

ومنذ زمن بعيد

وانا ابحث عنكِ

فهمت معنى وجودكِ...وإحتياجى لكِ

قبل كل شيىء

قبل ان ادرك حتى معنى ابسط الأشياء

الصداقة

العائلة

بحثت عنكِ قبل ان ابحث عن نفسى

ومن بين كل تلك الوجوه الباهتة هنا وهناك

اقتربت لعلى اجدكِ بينها

ستة وعشرون عاماً.....وأكثر

وانا انتظر

أحلم

أختنق

ولا تأتين

****

مازلت أنتظر

مازلت ابحث عنكِ بيأس فى وجوه الناس

ومازلتى تأتينى..بين أحلامى...من وقت لأخر

أريدكِ حقيقة

أو أختفى عنى للأبد

بيروت.........؟

بيروت
عارف انت الأسم اللى أول ما يجى فى وسط الكلام...لازم تقف شويه عنده
فى كتاب...فى مقال....أو حتى فى كلامنا العادى
عرفت دلوقتى ليه بيروت......بيروت؟؟

بعد أول يوم ليا هنا أقدر أقول..ان بيروت المعادلة الصعبة
بلد اوروبى...بطابع عربى
جبل ..وغابة...وبحر
وناسها ...أجمل ما فيها
صعب قوى تلاقى كل ده فى حتة واحدة
وعشان تشوف بيروت صح...انزل وأمشى ولف على رجلك
انزل وسط الناس
وسط البلد
الجميزة
مونو
اطلع على ارز الباروك
لف وشوف ودوق طعم اجمل عروسة فى الدنيا
لسة بقالى يومين بس
بس حاسس إنى خلاص
وقعت وحبيت
فهمت دلوقتى كلام انيس منصور عنها
وغزل كل الكتاب فى لياليها
فهمت الدموع اللى كانت بتزل وقت الحرب
فهمت بعد أول يوم بس
وحاسس إنى على اخر الرحلة هافهم اكتر واكتر
طب ليه بكتب هنا دلوقتى ومش مستنى أخر يوم
عشان عايز اشاركم فى اللحظة الحلوة اللى بعيشها
ما انا ياما كئبتكم...ونكدت عليكم
سلام مؤقت
وللحديث بقية

كباية ميه ساقعة

15-10-07
كل سنة وانت طيب يا منص....واحشنى جداً
****
مين هما اصحابك؟
ممكن نقول الناس اللى بتفتكرك وأنت بعيد عنهم..؟؟
ولا الناس اللى انت بتحتاجلهم لما تحس انك ضعيف.....؟؟
****
31-10-07
Ezayek ya 7biby?3mel aih?
w7eshny awe awe..A7'bark w
a7'bar elsho3'l eh?Tameny
3lik dyman.
Mesh 3ayz 7aga ab3athalk m3
faroq.ana kont sahran m3ah
embar7.
Take care
****
احساس غريب
لما تحس بتعاطف اصحابك معاك...شفقتهم
لما الأحساس ده يجرحك
ولأنهم هما بس اللى شايفينك من غير كل الوجوه اللى مركبها على وشك
وعلى قد ما ده اللى بيميزهم
على قد ما بتكره انك تحس بيه فى صوتهم
أو بين حروف رسالة جاتلك فى نص الليل
****
9-11-07
Ya ebnymfish 7aga liha t3m
men 3'irk!
Ay 7eta w ay 7ad sad2ny
mesh far2a...
Ensh2lah be2zno ya rab neksab.
3'alban 3and 3mr.w7eshny
awe awe..
nefsy ashofk b2a!
****
بخاف أوى من احساسى بالضعف
الضعف اللى سببه ارتباطك بحد
ذكريات..ومشاعر..وسنين
ولما تيجى لحظة الفراق
تلاقينى دايماً امثل إنى جامد
وأن اللحظة دى...لحظة الضعف دى
كنت شايفها من زمان..وعامل حسابى عليها
****
27-2-08
أحمد باشا غادة ولدت النهاردة
وجابت محمد الحمدلله
****
تفتكر عدم وجود اصحابك أو أهلك حواليك فى لحظة انت محتاجلهم فيها..هيفرق معاك؟؟
هيفرق فى مشاعرك..؟؟
لا...ده غصب عنهم وعنك
طب ممكن يفرق فى مشاعرك انت..؟؟
يعنى تتعود انك لوحدك
تتعود انهم مش موجودين
حاجة تانية
عدم وجودك انت فى لحظات معينة..هما محتاجينلك فيها..هيفرق معاهم..؟؟
ممكن فعلاً الناس اللى أنت بتحبهم..يتعودوا على عدم وجودك..؟؟
وتبقى مجرد مكالمة تليفون
أولها تسعة ستيتين..؟؟
****
18-3-08
Rabena yesahelo ya 3am :)
bas ana a3ed bardo fe west
elkuwait we ma3aya sa7bety
we bashayesh :)
****
الأكيد...ان فيه حاجة حلوة بينك وبينهم
وكون الحاجة دى لسة موجودة لحد دلوقتى..يبقى اكيد انتوا بتحاربوا عشان تفضلوا مع بعض
حتى لو بتليفون
أو برسالة صغيرة من كلمتين
تجيك فى نص الليل
وانت بتحاول تنام..عشان متفكرش
****
21-6-08
We7yat omy law sa7bety
mesh hatew7ashny keda.
Bmoot feky ya.................
****
وأنا بموت فى مجرد فكرة وجودكم فى حياتى
ممكن أكون ضيعت وقت كتير وانتوا حواليا
من غير ماأقولكم فى كل ثانية..وفى كل مكان
بحبكم
شكراً لكل المشاعر الجميلة اللى حسيتها معاكم
شكرا لكل لحظة حب حسيتها وسطكم
شكراً...وصدقونى..مش فارق معايا فى الغربة غيركم
****
العين بتروح لنظرة
من غير أزاى وليه

والقلب لما يعشق
مين يقدر عليه

دى الدنيا بحالها قايمة
ولا شاف حد بعينيه

كباية شاى بتضحك
لواحد شاى وايه

كباية ميه ساقعة قاعدة مش فاهمة حاجة
قالت يا خونا اهدوا..هية الحكاية إيه؟

كبايه شاى بتضحك
شوف ازاى الغرام

وصاحبنا خلاص هيخلص
وبرضة مفيش كلام

والاحلام اللى فضلت
مقضهاش منام

والسكر اللى دايب
محدش حس بيه

كباية مية ساقعة قاعدة مش فاهمة حاجة
قالت يا خونا أهدوا...هيه الحكاية ايه